İki oğullarının bir-birlərinin gözü qarşısında şəhid olduğu yerə getdilər - FOTO

44 günlük müharibədə Qırmızıbazar uğrunda döyüşlər zamanı şəhid olan İman və Bəhrəm Məmmədzadə qardaşlarının valideynləri övladlarının şəhid olduğu yerə baş çəkiblər.

Bu barədə sosial şəbəkələrdə foto paylaşılıb.

Qəhrəmanlarımızın valideynləri Elman və Hicran Məmmədzadələr övladlarının şəhid olduğu yeri ziyarət ediblər.

Xatırladaq ki, 22 yaşlı İmran və 20 yaşlı Bəhrəm Vətən müharibəsinin ilk günlərində cəbhəyə bərabər yollanıb.

İman Məmmədzadə 14 sentyabr 1998-ci ildə, Bəhrəm Məmmədzadə 18 aprel 2000-ci ildə Lerik rayonunun Kəlvəz kəndində anadan olub, orta təhsillərini Rusiyada alıblar. Təhsilini başa vurduqdan sonra Azərbaycana geri qayıdıblar. Bəhram 2019-cu ildə iyun ayının 11-də qardaşı İman ilə birgə Vətənə olan borcunu ödəmək üçün həqiqi hərbi xidmətə çağırılıb və o da Qusar rayonunun "N" saylı hərbi hissəsinə yola salınıb.

Bəhram və İmran Məmmədzadələr 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Xocavənd rayonunun Qırmızı Bazar qəsəbəsinin azadlığı uğrunda gedən döyüşlərdə savaşıblar. Qardaşlar döyüşlər zamanı eyni döyüşdə və bir-birlərinin gözləri önündə şəhid olublar.