Güclü ordu müstəqil dövlətin etibarlı dayağıdır

Müstəqil Azərbaycan Respublikasının dövlətçilik tarixində əldə etdiyi ən fundamental və strateji nailiyyətlərdən biri, şübhəsiz ki, yüksək döyüş hazırlığına malik, güclü və peşəkar milli ordunun formalaşdırılmasıdır. Milli təhlükəsizliyimizin qarantı, dövlət sərhədlərimizin toxunulmazlığının hamisi və xalqımızın dinc, firavan həyatının əsas təminatçısı olan Azərbaycan Silahlı Qüvvələri bu gün qlobal miqyasda və regionda ən qüdrətli, hazırlıqlı ordulardan biri qismində çıxış edir. Ordumuzun keçdiyi şərəfli inkişaf və təkamül yolu xalqımızın sarsılmaz əzmkarlığının, sonsuz Vətən sevgisinin və köklü dövlətçilik ənənələrinin bariz təzahürüdür.

Müasir Azərbaycan Silahlı Qüvvələrinin formalaşmasında və institusional inkişafında Ulu öndər Heydər Əliyevin müstəsna və tarixi xidmətləri mövcuddur. Ulu öndər Heydər Əliyev ölkəmizə rəhbərlik etdiyi bütün dövrlərdə milli hərbi kadrların yetişdirilməsi işini xüsusi diqqət mərkəzində saxlamış, müstəqilliyimizin bərpasından sonra isə dağınıq qüvvələri birləşdirərək nizami ordu quruculuğunun möhkəm təməllərini atmışdır. Onun uzaqgörən və strateji siyasəti sayəsində Azərbaycan Ordusu milli maraqlara xidmət edən monolit bir struktur kimi formalaşmağa başlamışdır.

Ulu öndərin əsasını qoyduğu bu mütərəqqi siyasi kurs bu gün cənab prezident İlham Əliyev tərəfindən böyük uzaqgörənlik və qətiyyətlə uğurla davam etdirilir. Son illər ərzində həyata keçirilən məqsədyönlü, genişmiqyaslı islahatlar və tədbirlər nəticəsində Silahlı Qüvvələrimizin maddi-texniki bazası əhəmiyyətli dərəcədə modernləşdirilmiş, ordumuz ən müasir silahlar, yüksək texnologiyalı hərbi avadanlıqlar və döyüş texnikası ilə tam təchiz olunmuşdur.

Azərbaycan xalqının çoxəsrlik şanlı tarixinə qızıl hərflərlə yazılan 44 günlük Vətən müharibəsi Silahlı Qüvvələrimizin rəşadətini və qüdrətini bütün dünyaya əyani şəkildə nümayiş etdirdi. Müzəffər Ali Baş Komandan cənab prezident İlham Əliyevin dahi sərkərdəliyi, dəmir iradəsi və rəhbərliyi altında Azərbaycan Ordusu döyüş meydanında yüksək peşəkarlıq, sarsılmaz rəşadət və böyük qəhrəmanlıq nümunələri göstərərək tarixi Zəfərə imza atdı və torpaqlarımızı işğaldan azad etdi.

26 İyun – Azərbaycan Respublikasının Silahlı Qüvvələri Günü bu şanlı tarixi yazan, Vətən uğrunda canından keçən qəhrəman oğul və qızlarımıza, müzəffər hərbçilərimizə xalqımızın göstərdiyi sonsuz ehtiramın və minnətdarlığın ən uca ifadəsidir.

Zabrat qəsəbəsi, 307 nömrəli tam orta məktəbin
Təşkilatçısı Elşən Rəsulov