Tanınmış idmançılar daim cəmiyyətin diqqət mərkəzindədirlər

İdmançılar beynəlxalq yarışlarda ölkəni təmsil edərək yalnız şəxsi nailiyyət qazanmırlar, eyni zamanda dövlətin nüfuzunu artırırlar. Məsələn, Avropa çempionatı və digər mötəbər turnirlərdə qazanılan qələbələr xalqda qürur hissi yaradır. Belə uğurlar nəticəsində idmançılar geniş ictimaiyyət tərəfindən tanınır və onların fəaliyyəti daha yaxından izlənilir. Prezident İlham Əliyev Avropa çempionatında böyük uğur qazanan Azərbaycan güləşçilərini qəbul edərək onları təbrik edib. O bildirib ki, bu qələbə bütün xalq üçün böyük sevinc mənbəyidir və Azərbaycan güləşinin Avropada lider mövqeyini bir daha təsdiqləyir. Dövlət başçısı vurğulayıb ki, müasir dövrdə güləş üzrə rəqabət çox güclüdür və belə bir şəraitdə komanda hesabında birinci olmaq böyük nailiyyətdir. O qeyd edib ki, həm təcrübəli, həm də gənc idmançıların uğurları ölkədə düzgün məşq və seleksiya sisteminin qurulduğunu göstərir. Prezident həmçinin bildirib ki, idman nailiyyətləri gənc nəslin vətənpərvərlik ruhunda tərbiyəsində mühüm rol oynayır. Azərbaycan bayrağının beynəlxalq arenalarda qaldırılması xalqda qürur hissi yaradır. Müasir dövrdə idman yalnız fiziki fəaliyyət sahəsi deyil, həm də cəmiyyətin sosial və mənəvi həyatında mühüm rol oynayan bir sahədir. Tanınmış idmançılar qazandıqları uğurlar, nümayiş etdirdikləri iradə və əzmkarlıq sayəsində milyonlarla insan üçün nümunəyə çevrilirlər. Məhz buna görə də onlar daim cəmiyyətin diqqət mərkəzində olurlar. Tanınmış idmançıların diqqət mərkəzində olmasının digər səbəbi onların gənclər üçün ideal rol modeli hesab edilməsidir. Gənc nəsil onların həyat yoluna, davranışlarına və uğur hekayələrinə baxaraq özlərinə istiqamət götürür. Bu baxımdan idmançının yalnız yarış meydanında deyil, gündəlik həyatda da nümunəvi davranışı xüsusi əhəmiyyət daşıyır. Onların məsuliyyətli, mədəni və vətənpərvər davranışları cəmiyyətə müsbət təsir göstərir. Digər tərəfdən, populyarlıq idmançılar üçün əlavə məsuliyyət yaradır. Cəmiyyət onların hər addımını izləyir, davranışlarını qiymətləndirir. Bu səbəbdən tanınmış idmançılar ictimaiyyət qarşısında daha diqqətli olmalı, etik normalara riayət etməlidirlər. Tarixdə bəzi idmançıların uğurlarına baxmayaraq, qeyri-düzgün davranışlarına görə nüfuzlarını itirdikləri hallara rast gəlinir. Bu isə göstərir ki, idmançı üçün yalnız medal qazanmaq kifayət deyil, həm də yüksək mənəvi keyfiyyətlərə sahib olmaq vacibdir. Azərbaycan idmanında da bu tendensiya aydın müşahidə olunur. Prezident İlham Əliyev tərəfindən dəfələrlə vurğulandığı kimi, idmançılarımız həm yarışlarda, həm də gündəlik həyatda ölkəni layiqincə təmsil etməlidirlər. Bu yanaşma idmanın təkcə fiziki deyil, həm də mənəvi inkişaf vasitəsi olduğunu göstərir. Çıxışda idmanın dövlət siyasətinin mühüm istiqamətlərindən biri olduğu qeyd edilib. Ölkədə keçirilən beynəlxalq yarışlar və yaradılmış idman infrastrukturu bu sahənin inkişafına böyük töhfə verir. Prezident İlham Əliyev xüsusi olaraq vurğulayıb ki, həm yunan-Roma, həm sərbəst, həm də qadın güləşi üzrə əldə olunan nəticələr Azərbaycanın bu sahədə kompleks inkişafını göstərir. O, gələcəkdə qadın güləşçilərin də daha çox qızıl medal qazanacağına inamını ifadə edib. Sonda Prezident idmançıların yalnız yarışlarda deyil, gündəlik həyatda da nümunəvi davranış sərgiləmələrinin vacibliyini qeyd edib və onları hər zaman ölkəni ləyaqətlə təmsil etməyə çağırıb.
Bakıxanov qəsəbəsi, 107 nömrəli tam orta ümumtəhsil məktəbinin
psixoloqu Gülarə İsmayılova